«Чылыг сөстүң одаа»

Дыл – кажан-даа, каяа-даа эң чугула чепсек. Тыва дыл дээрге бистиң үе-дүптен бээр бурунгу чонувустуң, өгбелеривистиң чүс-чүс чылдар дургузунда аралажып-чугаалажып келген дылы-дыр. Тыва дылывыс катаптаттынмас байлак, чараш аялгалыг, онзагай дылдарның бирээзи.

Тыва Республиканың А. С. Пушкин аттыг национал ном саңының чурт-шинчилел чогаалы болгаш национал библиография килдизиниң ажылдакчылары ноябрь 28-тиң хүнүнде, «Чылыг сөстүң одаа» бөлгүмнүң ээлчеглиг чыыжынга, «Тыва дыл амгы үеде» деп хемчегни эрттирген.

Ук хемчегге Тываның гуманитарлыг болгаш тускай социал-экономиктиг шинчилелдер институдунуң башкарыкчы эртем ажылдакчызы, филология эртемнериниң кандидады Надежда Серээдар, Национал школа хөгжүдер институттуң биче эртем ажылдакчызы Чочагай Хомушку, Тываның күрүне университединиң даштыкы дыл башкызы Тайгана Назынчап, Кызылдың 1 дугаар ортумак школазының 9 «в» клазының өөреникчилери идепкейлиг киришкеннер.

Хемчегге тыва дылдың сагыыр ужурлуг дүрүмнери сагыттынып турар бе? Тыва дылывысты кайы хире хумагалап, хүндүлеп турар бис? Делегей четкизиниң тыва дылга салдары, социал четкилерде частырыглар кайы-кайы сөстерде хөйү-биле таваржып турарыл дээш, оон-даа өске хөй айтырыгларны чугаалашканнар.

Өөреникчилер база келген номчукчулар тыва дылга хамаарышкан ажыктыг чүүлдерни билип алганынга өөрүп, четтиргенин илереткеннер.

---