«Чылыг сөстүң одаа»

Кижи бүрүзүнүң амыдырал-чуртталгазы өг-бүледен эгелээр. Өг-бүле кайы-даа үеде ниитилелдиң кол өзээ болуп артар.

Июль 8 – бүгү Россияда өг-бүле, ынакшыл болгаш шынчы чоруктуң хүнү.

Ону бир дугаар, 2008 чылда – өг-бүле чылында байырлап эгелээн. А. С. Пушкин аттыг национал ном саңында «Чылыг сөстүң одаа» деп чогаал бөлгүмү ажылын уламчылап, «Салым-чаяанныг өг-бүле» деп ужуражылганы Кызылдың кырганнар болгаш инвалидтер дазылга бажыңынга чурт-шинчилел чогаалы болгаш национал библиография килдизи эрттирген.

Ол хүннүң кол аалчылары Тывавыстың база бир билдингир салым- чаяанныг ѳг-бүлези, Санкт-Петербург хоорайның театр уран чүүлүнүң күрүне академиязының доозукчулары, В. Кѳк-оол аттыг национал хөгжүм-шии театрының Улустуң артистери Олег Бадыевич, Саяна Дүгер-ооловна Саттар аалдап чедип келген.

Хемчегни дазылга бажыңының ном саңының ажылдакчызы Людмила Донгак «Ѳг-бүле» деп шүлүк-биле эгелээн.

Олар театрның сценазынга баштай ойнап көргүскен В. Көк-оолдуң «Хайыраан бот» деп шиизинде Караның ачазы Сарыг-ашакты база Уранның авазын болгаш күрүне шылгалдазын эртип тургаш, испан шииге кады ойнаанын сактып, хоочуннарның сонуургаан айтырыгларынга солун, ода харыыларны берип, чугаалааннар: «Шиилерге ойнаан овур-хевирлеривисти сеткиливистен ойнап күүседиринге ынак бис, ол ышкаш тыва улустуң тоолдарын, ылаңгыя «Бора шокар аъттыг Боралдай ашак» деп тоолду катап-катап номчуур бис».

Артистер хоочуннарга «Тыва чурттум», «Дус-Даамайны» деп ырыларны, А. Даржайның «Авамга боодал чечээм», Э. Мижиттиң «Ботка чагыг» деп шүлүктерин болгаш «Бодалдар биле ужуражылга» деп сценажыткан кыска кѳргүзүгнү ойнап, көргүскеннер.

Хоочуннар артистер-биле чоок таныжып, боттарының уран-талантызын база көргүскен. Дазылга бажыңының ажылдакчызы А. В. Саая база хоочун В. Д.-Х. Сат өг-бүле дугайында ырыларны күүсеткеннер.

Ыры-шоорлуг ужуражылганы «Ыржым кежээ» деп ыры-биле доозуп, хоочуннар ном саңының ажылдакчыларынга, артистерге четтиргенин катап-катап илереткеннер.

 

---