«Библиокараван»

Апрель 15-те Тываның Улустуң чогаалчызы, эртемден, этнограф, төөгү эртемнериниң доктору М. Б. Кенин-Лопсанның төрүттүнгенинден бээр 100 чыл оюнга тураскаадып, А. С. Пушкин аттыг национал ном саңының «Библиокараван» деп маршруду ажылын уламчылап, Тес-Хем, Эрзин кожууннарының тѳпчүткен ном саңнарынга четкеннер.

Аңаа Самагалдайның 1, 2 дугаар школаларының 5 «б», 9 «в» класстарының өөреникчилери, класс башкылары А. Увангур, А. Сандый-оол, школаның ном саңының ажылдакчылары Л. Сандый-оол, Э. Саул база Эрзинниң С. Чакар аттыг школазының 9 «в» клазы, башкызы Ч. А. Ондар, чогаалчының мѳгейикчилери, идепкейжи хоочун номчукчулар: С. Д. Дажымба, Ч. Ш. Төре, А. А. Чооду киришкеннер.

Бодалдары делгем, сураглыг чогаалчывыстың чогаалдарын улам-на диргизип, ханызы-биле таныштырып, национал ном саңының ажылдакчылары өөредиглиг солун презентация - дыңнадыгларны кылган.

Өгбе чогаалчывыс М. Кенин-Лопсанның библиографтыг айтыкчызын база ооң «Төлге» деп сонеттер чыындызының 2-ги үндүрүлгезин кожууннарның ном саңнарынга белекке берген.

Чогаалчының адын мөңгежидип, кижизидикчи утказы делгем, бир янзы мындыг үнүүшкүннерни мооң-даа соңгаар кылып турарын келген киржикчилер сонуургап, ѳѳрүп четтиргенин илереткеннер.

Хемчегниң тѳнчүзүнде тѳѳгүлүг, ниити чурукка тырттырган.

Тываның Улустуң чогаалчызы Кенин-Лопсанның 100 харынга тураскааткан «Библиокараван» улаштыр, апрель 17-де, Улуг-Хем, Чаа-Хѳл кожууннарынче оруун ам-даа уламчылаар.

---