Март 19-та чурт-шинчилел чогаалының болгаш национал библиография килдизиниң ажылдакчылары Тываның Улустуң чогаалчызы, башкы Мария Күжүгеттиң юбилейинге уткуштур ужуражылганы эрттирген.

Мария Күжүгет 1955 чылдың март 22-де Барыын-Хемчик кожууннуң Аянгаты сумузунга төрүттүнген. Аянгатының ортумак школазын, Кызылдың күрүнениң башкы институдунуң филология факультедин дооскан.

Барлык, Тээли школаларынга орус дыл, Ак-Довурак хоорайның 2 дугаар школазынга тыва дыл башкылап чораан. 1997 чылдан бээр амгы үеге чедир Тываның күрүне университединде ажылдап чоруур.
Чогаал ажылынче 1977 чылда кирген. 1978 чылда бөлүк шүлүктери «Дамырак» деп аныяк шүлүкчүлерниң чыындызынга үнген. Дараазында чылдарда «Сактыышкыным чадаганы» (1994), «Салымымның кавайы» (2000), «Идегел» (2005), «Анайжыгаш» (2007), «Сеткилим орбазында» (2009) «Бүрү болгаш мен» (2020), «Дүңгүр ыры» (2025) деп номнары чырыкче үнгүлээн.

Мария Күжүгет – шүлүкчү, прозачы, очулдурукчу, Россияның болгаш Тыва Республиканың чогаалчылар Эвилелиниң кежигүнү, Тываның улустуң чогаалчызы (2022).

2011 чылдан тура Тываның күрүне университединиң филология факультединде литературлуг музейниң үндезилекчизи болгаш удуртукчузу. Ында уран чогаалга сундулуг сургуулдар-биле «Сорунза» деп бөлгүмде ажылдап чоруур.

Мария Амын-ооловна – амгы тыва чечен чогаалда билдингир апарган чогаалчы, башкы.

Ужуражылганың эгезинде В. М. Халилов аттыг күрүне филармониязының аныяк ыраажызы А. Ондар «Тывызыксыг оран» деп ырыны аалчыларга бараалгаткан. Ырының сөзүн М. Күжүгет, а аялгазын А. Йомужап бижээн.

Чогаалчыга байыр чедирип, чогаадыкчы ажыл-ижин үнелеп Тываның билдингир чогаалчылары: Черлиг-оол Куулар, Шаңгыр-оол Суваң, Николай Куулар, Лара Хомушку, эртемденнер – Зоя Самдан, Василий Салчак база аныяк эртемденнер: Шеңне Хомушку, Соруктуг Шивитпей башкызы Мария Күжүгеттиң дугайында чылыг сактыышкыннарны чугаалаанын демдеглевес аргажок.

Ол ышкаш Тываның күрүне университединиң башкылары – Екатерина Чамзырын, Аржаана Сарыглар, Кызылдың башкы колледжизиниң ясли-садиктерге башкылаар мергежилдиң 2 дугаар курузунуң сургуулдары, чогаалчының эш-өөрү Любовь Адыг-Тюлюш, Р. Ш. Иргит база чоок кижилери келген.

Ук ужуражылгага Россия Федерациязының алдарлыг артизи база Тываның улустуң артизи Анзат Куулар Мария Күжүгеттиң бижээни шүлүктерин база «Кара чаңгыс эжим» деп ырызын аалчыларга бараалгатканы онзагай.

Аалчылар чогаалчының хуулгаазын демир-үжүү ам-даа чараш шүлүктерни, улуг хемчээлдиг чогаалдарны номчукчуларга бараалгадырын база каң дег быжыг кадыкшылды, аас-кежикти катап-катап күзеп турганнар.

Шүлүкчү, прозачы, очулдурукчу Мария Күжүгеттиң мугур харлаан юбилейлиг ужуражылгазы солун, уттундурбас болуп эрткен.

---