Семинар «Медиатека: хөгжүмнүг аас чогаалдың электроннуг курлавырын ажыглаары»

Апрель 2-ниң хүнүнде уругларның уран чүүл школаларының "хөөмей" класстарының башкыларынга "МЕДИАТЕКА: ХӨГЖҮМНҮГ ААС ЧОГААЛДЫҢ ЭЛЕКТРОННУГ КУРЛАВЫРЫН АЖЫГЛААРЫ" деп семинарны Ч.С. Тумат, О.Х. Ноозун эрттиргеннер.

Амгы үеде Хөөмей Медиатеказының (https://khoomey.ru/) кичээлдерге ажыктыының база ажыглап өөрениириниң дугайында тайылбырны кылыры негеттинип келгенинден, дааразында айтырыглар башкыларның кичээнгейин хаара туткан:
1. Медиатеканың электроннуг өөредилге курлавыры кылдыр хөөмей кичээлдерге ажыглап өөрениири;
2. Хөөмейжилерниң болгаш хөөмей башкыларының мергежилин бедидери.

Кысказы-биле түңнээр болза, өөреникчилерниң тускай билиглер бедидеринге бир дугаарында, тыва хөөмейниң онзагайын, чугула айтырыгларын сайгарып билип алырынче; чаа билиглерни чедип алырының янзы-бүрү аргаларын өөренииринче; теориялыг билиглерни шиңгээдип, херек кырында ажыглап, эртем ёзугаар угаап боданырын хевирлээринче; эстетиктиг көрүштүг болурунче; келир үеде бот-хуузунуң ажыл-херекчи байдалдарынче угландырып, хөөмей эртемин ханы өөрениринче угланган.

Хөөмейжи аныяк өскенниң ниити билиглеринге – Тываның төөгүзү база бойдузу, тыва дыл, аас чогаал, езу-чаңчылдар, национал идик-хеп дээш оон-даа өске хамааржыыр. Ол бүгүнү сонуургавайн, чүгле күүседилгезин чаңгыс талалап сайзыраткаш турар болза, өөреникчиниң ниити билии «аскап» болурунуң барымдаазы бар. Ынчангаш хөөмейниң үндезини тыва дылда, чаңчылдарда, ёзулалдарда, материалдыг болгаш сагыш-сеткил культуразында сиңген дээрзин катап база шиңгээдип алдывыс.

Оюмаа Ноозун,
“Хөөмей” Академиязының өөредилге килдизи.

---