Чаа ном

Хүндүлүг номчукчулар, тыва чогаалдың мөгейикчилери!

Аныяк чогаалчы Саргылана Саая «Чогаалымдан төөгүп берейн»  деп чаа номун Национал ном саңының фондузунга белекке берген. Ук ном авторнуң баштайгы ному. 

Саая Саргылана Валерьевна  Улуг-Хем кожууннуң Ийи-Тал сумузунга дѳрт ажы-тѳлдүг ѳг-бүлениң дун уруу бооп тѳрүттүнген. Школаны 1995 чылда дооскаш, 1996 чылда Турцияже ѳѳренип чорупкаш, 2002 чылда Турцияның күрүне Селчук университединиң экономика факультединге эртем чедип алган. «Экономист-менеджер» деп шынзылга бижикти холунга алгаш, Тываның Садыг-саарылга яамызынга баштайгы ажылчын базымнарын эгелээн. Ол спортка хандыкшылдыг, ырлаарынга, чогаадырынга салым-чаяанныг. 2009 чылда «Ийи сылдыс» деп деп ыры мѳѳрейинге түрк дылга ырыны күүседип, уран-талантызын, тѳлептиин кѳргүскен. 2011 чылда «Орай күзел» деп аттыг кинону чогаадып үндүрген.

Саргылана Валерьевна школачы тургаш-ла, чогаалды сонуургап чораан. Школаның «Сорунза» аттыг чечен чогаал бѳлгүмүнүң баштайгы ѳѳреникчилериниң бирээзи. Ынчан-на шүлүктер чогаадып, шенеп эгелээн. Ооң шүлүктери, кыска тоолчургу чугаалары «Сылдысчыгаш», «Тываның аныяктары», «Улуг-Хем» солуннарынга үнүп турган.

«Чогаалымдан төөгүп берейн» деп номунда «Бүтпээн келин», «Коронавирус халдава», «Риэлтор Хорагай», «Бомж Чочагай», «Он муң акша» дээш оон-даа ѳске солун  чечен чугаалар база «Сургуулдарның ужуралдары» деп кыска тоожу кирип турар. Олар ала-чайгаар-ла номчукчунуң кичээнгейин хаара тудуп, сонуургалын чаалай бээри чигзиниг чок.

Авторга Национал ном саңының мурнундан четтиргенивисти илередип,  моон-даа соңгаар чаа чогаалдары немежиринге идегеп, демир-үжүү ылгын болурун күзедивис!

          

---