Чоннуң сүлдези

2023 чыл бистиң республикавыста Эп сеткил каттыштырылгазының чылы кылдыр чарлаттынган. Тыва үндезин культура төвү Чазактың чарлаан чылын деткип, «Чоннуң сүлдези» деп тѳлевилелин эрттирген.
Бо тѳлевилел 2021 чылдан тура республикавыстың чурттакчы чонунуң сагыш-сеткилин байлакшыдар, мѳзү-бүдүжүн, делегейже көрүүшкүнүн тыва ёзу-чаңчылдарның, бурунгу ужурларның дузазы-биле сорук киирер, чараш чүүлдерже бодалдарын угландырар, кижи амытанның амыдыралга быжыг туружун доктаадыр сорулгалыг ажылын эгелээн. Тѳлевилелдиң дээштиг хемчеглериниң доктаамал хевирлеринче ада-ие харылзаазын быжыктырар беседалар, бойдуска, кадыкшылга база амы-тынга харыысалгалыг болурун билиндирер ажык чугаалар, уран чүүлге хандыкшыдар мастер-класстар, хоочуннар база аныяктар-биле ужуражылгалар, янзы-бүрү презентациялар, концерттер, спортчу оюннар кирип турар.
2023 чылдың май 11-12-де ук тѳлевилел Өвүр биле Тес-Хем кожууннарның кыды-кызыгаар сумулары Ак-Чыраа, О-Шынаа, Ү-Шынааже үнүүшкүннерни кылган. Ук девискээрлер хүндүлүг дагдыныкчылар база малчыннар, салымныг самчылар, сурагжаан композиторлар, билдингир чогаалчылар болгаш журналистер, ус-шеверлер база чурукчулар, Тываның эртем база спорт хѳгжүлдезинге үлүүн киирип чоруур могаг билбес ишчилерниң чурту.
Бо чылын тѳлевилелдиң киржикчилери – Тыва Республиканың Камбы-Лама эргелели, Тываның Чаан мѳгези Сайын-Белек Тюлюш, Арзылаң мѳгези Айдың Монгуш, Тываның мерген адыгжылары Андрей Монгуш, Сылдыс Монгуш, Шагаа Мергени Артыш Монгуш, Тываның улустуң хѳѳмейжилери Игорь Кѳшкендей, Айдаш Барыңмаа, Тываның алдарлыг артистери Шолбан Ондар, Эдуард Дамдын, тѳѳгүлүг “Тыва” бѳлүү база Тыва тѳптүң ажылдакчылары. Каттышкан бѳлүктүң хемчеглеринче - номналга, тыва хүреш, тыва ча адары база тыва хѳгжүм-хѳѳмейниң мастер-класстары, Тыва үндезин культура тѳвүнүң тургузукчузу Коңгар-оол Ондарның дугайында документалдыг кино, сагыш-сеткилдиң дому болур аян ырлыг оюн-кѳргүзүг кирген.
Тѳп хоорайдан ырак черде чурттап чоруур чонувус ук тѳлевилелди сонуургап база манап турганы эптиг-демниг белеткел ажылында кѳстүп турган. Сумуларның буурул баштыг хоочуннары база аныяк-ѳскени тѳлевилелдиң хемчеглерин улуг сонуургап, ѳѳредиглиг база арга-сүмелиг кезектерин шиңгээдип ап, сагыш-сеткилиниң кѳдүрлүүшкүнүн ѳѳрүп четтириишкин сѳстери-биле илередип турганнар.
Кайгамчык каас-чараш алдын-сарыг шынааларлыг, сүүр-бедик сыннарлыг бойдуска бүргеткен чон болгаш, ындыг ийик бе, эвилең-ээлдээ, эп-найыралдыы арын-шырайында, чугаа-домаанда илереп, тѳлевилелдиң киржикчилерин магадаткан.
Демнигде күштүг, тепкииштигде быжыг дээр болгай, “Чоннуң сүлдезин” деткип, улуг үлүг-хуузун киирген чонувуска Тыва үндезин культура тѳвүнүң мурнундан ѳѳрүп четтиргенивисти илереттивис!
Чоннуң сүлдези бедик чорзун! Курай-Курай!
Поиск новостей
Метаданные новости
- Дата: 17 мая 2023 г. 12:23
- Разместил: Тыва_төп
- Источник: https://vk.com/tuvacenter?w=wall-64833533_19032>