"Сыгыт ырың чырыткызы" ыры-хөгжүмнүг кежээзи

Амгы үеде аравыска турган болза 50 чыл оюн уткуп турар ужурлуг. Ындыг-даа бол Тыва чоннуң база бир төлептиг оглу болганында, ооң 50 чыл оюн чону уткувас арга чок. Аныяанда-ла “аъдының бажы хоя” берген театрның артизи Оолак Ондар Ортун-ооловичиниң чырык адынга тураскаадып база ооң уран талантызынга мөгейип “Сыгыт ырың чырыткызы” деп ыры-хөгжүмнүг сактыышкын кежээзи болурун чонувуска дыңнадып тур бис.

Оолак Ондар Сүт-Хөл кожууннуң Суг-Аксы суурунга 1973 чылдың январь 1-ниң хүнүнде арат өг-бүлеге төрүттүнген. Школачы үелеринден тура спортка, ылаңгыя хүрешке болгаш уран чүүлге сонуургалы бедик, идекпейжи болуп чораан. Өөреникчилер аразынга Республика чергелиг хүрештерниң чаңгыс удаа эвес тиилекчизи. Школазының хемчеглеринге, ыры-хөгжүмнүг көргүзүглеринге ыяңгылыг сыгыды-биле албан киришкен турар. А 1990 чылда школазын дооскаш, Санкт-Петербург хоорайның күрүнениң кино болгаш театр академиязынче өөренип кирип алган. Сургуул чылдарында өөредилгезиниң улдуң демдектерин тергиин кылдыр доозуп, башкыларының сонуургалын чаалап ап, ынак өөреникчизи болуп чораан. Чаңгыскурсчулары Откун Достай(хөөмейлээринге) болгаш Станислав Ириль(каргыраалаарынга), олар-биле деңге “Өзүм” деп фольклор бөлүүн тургузуп алгаш, европа чурттарын эргий кезип, үнүүшкүннерин үре-түңнелдиг кылып чоруп турганнар.

1994 чылда академиязын чедиишкинниг доозупкаш, Тываның В.Көк-оол аттыг Национал хөгжүм-шии театрынга ажылдап чедип келген. Оолак Ондарның арын-шырайы бичиилерсиг болза-даа карактары кыптыгып турарындан эрес-шудургузу илдең, чаа шии салган режиссёр бүрүзү Оолакты топтап көргештиң, албан кол маадырларның аразынче киирип ап турганы магаданчыг. “Чаа дооскаш келген-даа бол, чүгүреңнээн карактарлыг Оолактың эрес-шудургузун чаптап магадаан мен. Ылаңгыя ооң бичиилерсиг арны. 70 хар-даа четсе, бичии оолак болуп артып каар ыйнаан бо деп чаптаан мен. Ынчалза-даа 70 хар четпейн, аныяк назынында-ла чоруй барганы дыка хомуданчыг” деп, Светлана Мунзук бодунуң интернет-четкиде арынынга ооң дугайында бижии-биле үлешкен. Эртежик чорткан бол, театрга киирген үлүү эвээш эвес. К.Гольдониниң “Деңгерлерниң айбычызы” деп шиизинде Труффальдинонуң, Ж-Б. Мольерниң “Жорж Данден” деп шиизинде Любенниң дээш оон-даа өске хөй шиилерде маадырларның овурларын тускай кылдыр тургузуп ойнаан. Оон аңгыда “Күзел” театрының шиилеринге база чаңгыс удаа эвес ойнап чораан. Шии маадырындан аңгыда тускай үннүг ыраажы болуп, Делегей чергелиг “Хөөмей” Симпозиумунуң чаңгыс эвес лауреат, дипломант деп бедик аттарның эдилекчизи чораан.

Хүндүлүг чонувус, май 21-ниң хүнүнде 17:00 шакта Тыва Национал театрга Оолак Ондарның 50 чыл ою таварыштыр “Сыгыт ырың чырыткызы” деп сактыышкын кежээзинче силер бүгүдени чалап тур бис!