Ада-чурттуң Улуг дайынынга Тиилелгениң 80 чыл ою

Миннип кээрге чанында эмнелге ажылдакчылары, холун шарыдып алган дайынчы олурган.
- Силерниң идииңерге чораан чүве ийин бо – дээш хынында борашкан ханны бакка-сокка аштап каан тыва улуг бижекти олче сунган. Ойдупаа бодунуң бижээн кайгаан чүве дег элээн боданып ора:
- Адыңар кайызыл, кайы чурттуг силер? – деп айтырган.
- Сибирь чурттуг, Огнев Андрей Иванович деп кижи мен. Силерниң тыва гвардейжилер-биле үргүлчү кожа тулчуушкунче кирип турган бирги эскадроннуң дайынчызы мен, холумче балыглаткаш, кел чорааш силерни тулчуушкун шөлүнден тып эккелдим – дээрге, Ойдупаа аажок өөрээн.
- Өөрүп четтирдим, эш дайынчы, фронтуже чоруур деп турувуста, кандыг-даа чүве турар-ла болгай дээш ачамның меңээ берген бижээ чүве - дей тырттып кааш, тыва дарганның каңнап-сырылап кааны улуг бижекти хыны-биле кады Огневче дедир сунган.
- Менээ көргүскен буянныг дузаңарны кажан-даа утпас мен. Ол-ла бүгүну дээш, берген белээңерни дээш база катап четтирдим – дээш, Ойдупаа дайынчының берген белээ – савыяа хаптыг кинжалды топтап көре берген. “Четтирдим” деп сөсту тывалап чугаалаарга Огнев ону катап-катап айтырып, Ойдупааның чурттап турар чериниң адрезин бижип алган.
Балыглаткан буду өлүгленип шимчевестээн ужурунда Ойдупаа ол-ла хевээр тулчуушкунче-даа кирбээн.
Шынзыдылга: Оюн Ойдупаа Чассыгбай оглу (1910 - 1986) 1910 чылда Таңды кожууннуң Элегест суурунга төрүттүнген. Ооң чалыы чылдары Элегестиң С. Тока аттыг курэкономунга эрткен. Ада-чурттуң Улуг дайынының баштайгы үезинден эгелээш, Оюн Ойдупаа Элегес сумузунуң даргазынга ажылдап турган. Ойдупаа Оюн Чассыгбай оглу улуг лейтенант Оюн Оолактың взводунга дайылдажып чораан. Дөрт алышкыларның улуу Ойдупаа дайынче чоруурда үжен үш харлыг турган. Ойдупаа дуңмалары-биле Деражно суур, Ровно хоорай дээш тулчуушкуннарынга эрестиг тулушканнар.