Тывада Амаду Мамадаков чедип келген

Бөгүн ТР-ниң культура сайыды хөйге билдингир кино артизи Амаду Мамадаков-биле ужурашкан. Аңаа Амаду Мамадаков бо кежээ 19:00 шакта “Найырал” кинотеатрынга “Шаман” деп уран-чечен фильмниң таныштырылгазын кылыр дээнин дыңнаткан. Боду ол фильмде кол рольдарның бирээзин күүседип турар.
Амаду Мамадаков – театр болгаш кино артизи кылдыр хөйге билдингир апарган Даг Алтайы чурттуг артист. Ол “Солдаты” (Вакутагин), “Монгол” (Таргутай), “9 рота” (Курбаши) деп уран чичен-фильмнерге ойнааны-биле алдаржаан. Ол Даг Алтайының, Тыва Республиканың алдарлыг артизи.
Бөгүн болур «Шаман» деп кинонуң көрүлдезиниң соонда, ооң-биле ужуражылга болур. Көрүкчүлер сонуургаан айтырыгларын артистен салып болур. Ол ужуражылгага бодунуң киржип турары чаа төлевилелдериниң дугайында таныштырар деп турар. Чижээ, Россияның Маадыры, бистиң чаңгыс чер чурттуувус Мерген Донгак дугайында уран-чечен фильм тырттырар төлевилелге фильмниң кол маадыры Мерген Донгактың ролюн ойнаар кылдыр ону 2022 чылда-ла бадылаанын, кинону 2025 чылда Тывага, Хакасияга болгаш Красноярск крайга тырттырып эгелээр дээнин таныштырар.